https://hk.appledaily.com/finance/20201231/F2AOMA5THRGIVI2E7MCAZBUJNE/?utm_campaign=hkad_social_appledailyatm&utm_medium=social&utm_source=facebook&utm_content=link_post&fbclid=IwAR2bOOls321RAjWtASMYYMO6i7oT0Z8sTMM_BZymr_8K49T00bpK8hbqAAw

2020年令每位香港人十分難忘，回顧網上世界亦很難一篇文章說得清，但有位傳奇網絡紅人，有炒股的一定認識，就是論壇連登財經台紅人「麵咪媽」麵神，這位燈神本來接受訪問時，想向讀者送上2021年股票三大「明燈」，並預言恒指明年跌至21,000點，結果不負眾望，2021年未到已經大顯神蹟，燈中阿里巴巴（9988），後者他「祝福」後受反壟斷法纏身，股價急跌，幾乎蒸發今年以來的升幅，縱使如此，麵神依然想向大家說一句：「我不是燈神。」

今年27歲的麵神，與一般年青人無異，身形瘦削，頭上長期戴着冷帽，被網友問得最多的問題，非「牛定熊」莫屬，被問得多，已經懶得回答，今次來到蘋果做訪問，他卻不厭其煩向讀者推介ATM 3隻股票，除了阿里，還有騰訊（700）以及剛成為藍籌股的美團（3690）：「呢3隻股票不得了，係我2021年嘅重點推介。」不過訪問未出街，麵神已經率先在網上力推以上3隻股票，阿里巴巴率先中槍，因反壟斷法拖累股票下跌，單日曾跌8%，股價一度挑戰200元水平，「我潛緊水呀，因為真係解釋唔到點解會跌。」

燈神睇死滙豐
其實除了推介ATM之外，麵神亦預測恒指明年會跌至22,000點至21,000點附近，「因為個經濟係唔好，所以股市係跌。」但他推介的三大明燈都是藍籌股，他就解釋指：「咁個大環境跌就咩股票都跌，只係跌得多定少，呢3隻就跌得比較少囉。」至於今年另一隻跌到不似人形的藍籌股滙豐（005），麵神卻大力「睇淡」：「滙豐好難搞喎，啱啱先有啲起色，但又傳醜聞出來，我個人係唔睇好嘅。」各位讀者，可以自行判斷麵神的「睇法」。

麵神成為2020年香港網絡紅人之一，其燈力之準，令一眾網友五體投地，不計最近的阿里巴巴，要數其代表作，一定有兩大「神蹟」要提起，一是上半年出post說想炒石油股，結果出現負油價事件，第二件更利害，便是出口術燈死螞蟻集團，後者上市失敗後，令網友對他燈力深信不疑。事實上，麵神初初出道上連登開post派膠，是緣於炒牛熊證：「炒牛熊好刺激，所以上連登減壓，再貼吓自己買賣嘅截圖。」

麵咪媽否認做燈神
結果麵神戰績當然輸多贏少，漸漸被網民留意，他又樂於回答網友提問，並經常預測股市走向，至於預測結果，大家都知道，就是反方向。初期麵神有真金白銀買入股票，輸錢成燈神無可厚非，但近年麵神燈力「升呢」，即使沒有花錢買入股票，只是口講派膠，皆成為股海明燈，不過他卻不認同此看法，「其實我冇買到呢啲股票喎，你話我燈到負油價，其實當初我只係問有咩油股推介啫。至於螞蟻，我都係話上市後先買，咁佢上唔到市，唔關我事㗎喎。」他亦煞有介事拿出手機，向記者展示Telegram對話內容，「有網友話跟我買阿里巴巴，仲賺咗1萬，所以唔好再話我燈神啦！」不過他承認自己有時刻意派膠，「上連登都係派膠㗎啫，但估唔到大家咁認真對待我嘅睇法同預測。」心情好時，麵神對網友的提問有求必應，但他亦有認真懼怕之時，「你問我林鄭會唔會連任，我真係唔敢答喎，怕俾人拉喎。」

連登紅人患腦癌
派得膠多，就連啟動認真mode嘅post，都冇人相信，「大家都知道我而家有病啦，當然知道咗自己患上咗絕症時，開post講係冇人信嘅。」今年5月，麵神被診斷患上膠質母細胞瘤（GBM）第4期，做了8小時開腦手術，頭上留下10幾厘米的疤痕，「有日食食吓飯暈低，到少少清醒時已知要做開腦手術，切咗8cm嘅瘤出來，以為做完大手術就會好返，點知原來唔係咁簡單。」家人知道他患上絕症後，對他刻意隱瞞，「直到醫院寄封信來，我先知道自己有絕症，情緒即刻崩潰咗。」

事隔半年，化療做過，十幾萬的電場治療亦試過，唯一是家人故作堅強，從來沒在他面對傷心過，面對鏡頭，麵神以連登仔口頭蟬形容，自己已進入「看透世事」模式，「你而家問我仲會唔會喊，係唔會㗎啦，有時喺間房可能會喊到有啲悲傷。」醫生告知他還有兩年壽命，但他認為自己未必只有這麼短時間，「可能我有5年或者10年呢。」自從他在醫院遇過比他情況更慘的病友後，他便覺得自己的治療過程相對更舒服，「佢哋插晒喉，有啲病友仲叫醫生唔好醫佢，由得佢死咗冇咁辛苦。」

麵神認為自己命不該絕，在網上眾籌60多萬，加上有慈善資助30多萬，足夠應付他一年要做電場治療費用，他笑指，「部機一個月要10幾萬，但去到90幾萬就封頂唔收錢，可能佢都預咗啲病人用唔到超過1年...」

麵神在財經討論區燈力十足，別以為只有炒股的網友留意他，就連小朋友都是他的粉絲，「我患病後搞咗見面會，見到有8歲小朋友，又有60幾歲老人家，我唔會叫佢哋做fans，係朋友，不過佢哋見到我，就係問牛定熊囉，哈哈。」悲傷的事不能說太多，麵神亦表明一早安排身後事，「萬一我有事，家人會在網上出post交代，同大家講呢個係我最後一個post啦。其實我唔係想大家記得我，因為我冇做咩豐功偉績。」麵神走過傳奇的2020年，即使上天跟他開了一個玩笑，他亦覺得自己在不幸的事件中，是個幸運的人，「我家姐同朋友都幫咗我好多，你問我有冇遺憾，我覺得係冇嘅，不過我仲有兩手日清（1475），8.35元買，我會等到佢返家鄉嘅。」