【遠在咫尺系列Ep.10──刺客教條：梟雄，仲有1868年嘅香港】

維多利亞女王統治嘅年代，係大英帝國國力同殖民主義嘅高峰，如果談及一個以維多利亞時代為背景嘅故事，

好適合提起「當時嘅香港發生緊乜嘢」。


刺客教條：梟雄(2015年)設定喺1868年嘅倫敦。刺客姐弟伊薇同雅各組織自己嘅地下勢力，對抗潛藏倫敦各種階層嘅聖殿騎士。刺客同聖殿騎士分別代表自由同秩序，喺雅各接連暗殺包括醫界、交通業界、金融界等唔同領域嘅聖殿騎士之後，相關嘅秩序都陷入崩潰，幾乎斷送埋英國經濟。

1868年英國嘅遠東殖民地香港，都遇到金融發展上嘅挫折。雖然雅各暗殺金融界聖殿騎士令英國銀行擠提，應該不致影響香港，但喺兩年前嘅1866年，倫敦金融危機就已經令到好多香港銀行甚至老牌洋行顛地關門大吉。同年先開始運作嘅香港鑄幣廠亦受到波及，最終喺一年零十一個月之後嘅1868年倒閉，連相關機器都賣哂畀即將迎嚟明治維新嘅日本。


當然整體嚟講，香港當時嘅發展仲係每況越上。正如雅各行事再衝動，刺客兄弟會再重視個體自由，都需要組織抗衡聖殿騎士一樣，自開埠起就日漸凝聚嘅華裔港商，都喺1868年組織咗南北行公所。當然，公所唔需要你斬手指，只需要定期交錢，公所就會服務業界同社區。

喺繁榮光鮮嘅背後，就係夾雜住腐敗氣息嘅陰暗。如果伊薇姊弟嗰陣嚟到香港，比起新近幾年先落成嘅大會堂，更壯觀嘅肯定係公然合法嘅賭博。雅各喺倫敦打地下拳賽已經係喺法律灰色地帶嘅賭博，不分階層嘅合法賭博業，喺維多利亞年代被好多人視為違反道德。


然而喺1867年，港督麥當奴乾脆許可經營賭場。


佢可以成事，固然同佢嘅經歷同地位有關，但更重要嘅係佢對海盜、刑事審判等各個香港社會問題嘅態度。

要道德定係務實，呢個係一眾港督長年嘅難題。賭場禁令滋生出香港警察嘅貪污，因此麥當奴許可佢合法經營，反而可以抒解問題。喺1868年當下，賭博稅更加為香港政府帶嚟緊巨大嘅收入。然而呢啲被視為唔光彩嘅行業同稅收，將會一直被衛道之士抨擊，最終喺英國本土壓力下被取締，連筆賭博稅都需要凍結。

但就好似雅各刺殺作惡嘅聖殿騎士，最後導致更嚴重嘅混亂一樣，取消經營賭場許可之後，賭博同香港警察嘅貪污只有越發猖狂。刺客教條劇情嘅一個層次，正正在於刺客同聖殿騎士唔係老套嘅正邪之分，喺直觀嘅自由必然先於秩序之外，更多只係lesser evil嘅選擇。


到嚟緊嘅1869年，香港將會傳出廣福義祠衛生惡劣嘅醜聞，其後務實嘅麥當奴乘機將嗰筆賭博稅，用嚟成立日後深具凝結華裔族群功能嘅東華醫院。混沌、秩序、組織，就係咁樣交匯喺同一點上。


參考資料：
香港史──從鴉片戰爭到殖民終結，Frank Welsh著。2016年香港商務印書館出版
城邦 舊事 十二本書看香港本土史，徐承恩著。2016年紅出版
香港史新編，王賡武主編。2017年三聯書店出版

BTWAC其實係成個系列最初諗到嘅作品。


一直覺得用創作入面嘅歷史背景對照，會留低更深印象，暫定仲有幾隻game、小說同戲嘅歷史對照，亦集思廣益希望大家畀啲意見有無邊套嘢啱玩。