棱角

【人事世界】
壞鬼後生激死你
2024年08月01日

初入職場嘅新鮮人，有時候佢哋嘅行為模式或者處事手法往往會激到人事部扎扎跳。今次嘅受害者係某大機構嘅其中一位人事部朋友。話說佢招聘緊一個初級職位，係歡迎畢業生申請嘅，之前都講過呢啲咁樣嘅畢業職位會有大量嘅應徵者，朋友收到百幾二百份履歷，淨係睇都已經睇到眼盲，由於工作性質，佢prefer係有一位懂得中文嘅員工可以同中國大陸嘅廠溝通，於是乎最後short listed 咗三位畢業生，睇吓會唔會可以喺當中揀到一個。

見工嘅時候三位朋友仔都四平八穩各有千秋，當中其中一位睇起上嚟比較醒目，英語亦都講得流利，溝通冇問題，所以就決定俾Offer佢啦。去到呢度睇落去都冇乜問題喎，畢竟兩次嘅面試都唔係人事見，係部門主管同埋佢幾個同事一齊見，覺得佢適合，所以先叫人事proceed。咁人事部咪打個電話俾呢位朋友仔問清楚啦，跟住佢竟然話最好係下年一月先開工喎，嚇咗人事部一跳，喂，邊有人見工咁㗎，你真係諗住人家請你等你半年先開工？再問清楚啲，原來呢位小朋友仲要做多60日嘅實習先至畢到業，但係又冇同個經理講，因為佢天真地認為，希望六個月後先返工就係想搵一間公司可以填補咗實習60日呢個空缺，跟住一月先至正式嚟公司上班。

呢個係乜嘢諗法嚟㗎 ？完全唔明囉。朋友去到呢個位已經㷫㷫哋，因為有啲唔清唔楚，唯有問多佢兩句，亦都撳住自己度氣。後生仔先得嗰大概22歲鬆啲，成個表現就話俾你知佢應該係乜都唔識，反正經理而家擺到明係請Junior，唔識係冇所謂嘅，橫睇掂睇呢位小朋友都係一張白紙，出於俾個機會或者好奇心，朋友就打去嗰間大學問過究竟。其實之前都已經叫咗呢位小朋友問一問，過咗兩日send張form嚟答覆九唔搭八，所以朋友最後決定自己出手。佢話用咗唔使兩個鐘就搞清楚發生咩事，原來大學係冇指定話要喺某一啲公司先至可以做實習，總之係行業相關，而且又有人監督住，寫返份report就搞掂。

之後朋友打返俾呢位畢業生，佢開頭仲扭扭擰擰話有另外一個Offer要考慮，朋友即刻面都黑埋，就話俾呢位小朋友聽，你試吓同人講要搞咁多嘢，睇吓仲有冇人請你吖？後來校方更email通知，已得悉並已經聯絡有關學生，批出placement 要求，小朋友最後死死地氣（斷估都知道自己其實冇得揀），上班去也。


其實小朋友嘅面試係唔錯嘅，只不過入世未深，又冇好好做功課，知道自己畢業嘅要求，以為公司係願意等待佢完成實習又冇講清楚先搞到咁嘅大頭佛。所以喺度同各位畢業生講聲，學科需要實習先俾畢業唔係啲咩新鮮事，其實好多公司都會願意幫助，俾個機會大家，最重要係你自己要講清講楚，避免誤會，搞到自己明明見得成份工都冇咗就無謂啦。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。



支持我們：https://points-media.com/supports/

https://points-media.com/最新/【人事世界】壞鬼後生激死你/