【 2024年11月12日 快必開往拔摩島的航程 - 第1529日】

TAMtakchi Fast Beat

https://m.youtube.com/watch?v=22DylDwdN98

Nov 12
2024

1）今日收到快必11月2號寄出回覆大家嘅信，封信係10月嘅第六封回信。信嘅內容係咁嘅：

~黃鶯媽：繼續收到你幾封信、圖同文章，依然好勤力、好有心咁密密寄信給我，唔知轉啡色衫之後，你會唔會都咁密來信呢？你寄來嘅文章，我最喜歡睇諾貝爾文學獎韓江嗰啲報道，政治創傷文學要寫得好，一啲都唔容易，我之前睇過一啲，都寫得唔夠好。至於寫女性嘅處境，我幾個月前讀嘅加拿大文學獎得主Alice Munro，好睇。

~皇甫少爺的彩玉：收到你10月15號寄來有關於陳樞機嘅講座，你係唔係都屬於聖堂特種部隊呢？關於保良局救世軍嘅問題，我冇掌握太多資訊，只能夠話佢哋從來冇將我或者人民力量當做主要支持的政團，這實在是我們的幸運，感謝上主。我沒有偶像，也從不迷信，自由思想獨立人格係抵抗愚昧嘅第一要點，記住。

2)陳姑娘：10月尾收到你10月18號寫嘅信，相信你也有寄信給阿慢吧？！識於微時的朋友要珍惜，雖然不是經常見面，但卻雪中送炭，患難見真情，像我的中同。

~中同MK：收到你英國寄來嘅Postcard，上一張卡，你約我去Brighton游祼泳，今次呢張，你約我去踩滑板，不如我哋踢毽吖？！我喺船上四年幾，除咗拉筋平板緩步跑之外，踢毽踢唔少，功夫應該有返咁上下！

~Rebecca：收到你濟州島嘅Postcard，我未去過濟州島，南韓我只係去過漢城。有朋友去完韓國都買韓國時裝雜誌俾我，等我感受一下韓流韓風。感謝您亦都問候我家人，佢哋安好。The Seven Ages of Death我沒有讀過，有關人如何死亡嘅書，我反而知道有一本「How to Die」。近日有殯儀館開放日，又殯儀夜繽紛，又破地獄，香港人似乎越嚟越開放咁討論死亡，我都有寫過關於死亡嘅文章，介紹神學家莫特曼同哲學家馬賽爾嘅死亡論述。天路歷程嗰首歌都係你寄來嘅呢？首曲係天空之城嘅，我好鍾意宮崎駿嘅其中一個原因，係佢嘅故事好多用女性做主角，拯救人嘅都係女性，唔知你哋有冇發現呢？

3)10月尾收到一位無姓氏寄來嘅吉信紙，有布甸狗同Hello Kitty，近日我哋船上好興Chiikawa，唔知你哋知唔知道佢係乜呢？應該係倉鼠之類嘅漫畫主角，有好cute嘅眼，外型胖嘟嘟，膽小怕事但心地好。

~祈願者：收到你10月18號寄來嘅postcard， 你卡上面嘅說話令我諗起詩篇56篇第8節：「求你把我的眼淚裝在你的皮袋裏。」很浪漫而苦情嘅一句詩！

~小月：妳嘅妖怪Postcard亦都收到啦，葛飾北齋唔單止有富士山巨浪土，原來仲有妖怪圖，好正啊！我都幾鍾意日本嗰啲妖怪，古靈精怪，唔係太恐怖啫，所以我上次着白鬼夜行夏老威去劇院！

4)10月尾仲收到細妹同兩個外甥女嘅信，細妹話鍾意古着， 有taste啦，大外甥女話好鍾意收到我啲信，見字如見人，亦都好想快啲見到我真人，我話好快㗎啦， 11月19號就判刑轉啡衫，又近我返屋企嘅日子多一啲，一日一日捱，日日一日過，日日一日近，好開心！細外甥女就問我依家係唔係已經有六嚿腹肌？定係四嚿？我話俾佢知依家仲係四嚿，等我啡衫完落船嗰一日，李小龍嘅身材、坂本龍一嘅髮型，到時記得歡呼㖭啊！想知道我出場着咩衫？密切留意啦！

5)快必好快就轉啡色衫，換另外一隻船，如果你仲未寫過信俾快必嘅話呢，如果你怕羞、如果你好懶，咁就趁就嚟聖誕節，買張靚靚嘅聖誕咭寄入去同佢say hi啦！依家寄定聖誕咭差唔多啦，特別係海外嘅朋友，時差好長㗎 ！有時間寫埋比慢必都OK 㗎，一樣可以寄去七姊妹郵箱。

~寫開信嘅朋友，唔好停繼續寫呀。如果好耐冇寫信嘅呢，就快啲加入返筆友嘅行列。

~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！


來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）