【 2025年1月31日 快必開往拔摩島的航程 - 第1609日】

TAMtakchi Fast Beat

https://m.youtube.com/watch?v=dl53UGnT1jA

Jan 31
2025

//今日係年初三，係公眾假期。申請額外探訪，即係加探，係唔可以係假期，所以上個星期五，家人已經預早同快必團年兼拜年。二月份又開始，下星期快必生日，家人已經安排好去探佢。又大一歲嘅快必，之前寫咗封信同家人講呢個關於「幾多歲」嘅故事。//

在船上，和在岸上也一樣，啲人好喜歡討論人哋幾多歲。有一次，阿飛在剪頭髮時，嗰個彌敦道9號問：「你幾多歲啊？咁多白頭髮嘅？!」阿飛當時心諗，自己20幾歲嘅時候就已經鍾意有白髮，怪醫秦博士嗰種佢就最鍾意㗎啦，嗰時佢周圍去搵銀灰白色嘅gel，想將前面嘅一撮頭髮染白，後來佢發現自己變唔到怪醫秦博士，只係變咗李純恩咁，嗰時冇太多人知道邊個係李純恩。今日亦都唔係好多人知啩。

阿飛冇答到彌敦道9號，佢再追問：「你幾多歲啫？有冇四十幾呢？」

「41 ，啱啱過咗生日， 42啦。似唔似呢？」阿飛自欺欺人咁答9號仔。

「哦……咁睇起上嚟就老咗一啲啦。」9號仔心諗估錯咗㖭，其實佢一向估乜都錯、估波錯、估馬錯、估恒生指數又錯，乜都錯，所以爭落周身債！

見到9號仔有啲驚訝嘅表情，阿飛就反客為主，問佢：「咁，你睇我似幾多歲呢？」

「我以為你45歲左右啦」

「乜我似45咩？」阿飛喜出望外，嘴角微微上揚，心諗，點樣可以再呃多少少呢。

「講44都得嘅，都似嘅，有人信嘅。」阿飛聽到9號仔咁講，開心到飛起咁嘅阿飛，直頭好似有三份一咁happy。

「真係呃你唔到添，我今年其實43 ，話名44。有眼光啊你！」阿飛笑笑口同9號仔講。

「所以，我一早就話你四十幾囉， 44就啱啦，差唔多啦。」9號仔滿意咁笑，覺得自己今次終於估中！但阿飛笑得仲開心，知道自己個樣呃得下人，後生咗10年8年咁！

又有一次，喺船上同其他人踢毽，其中一個光頭佬同學問：「你應該細過我啦，我1978年出世。」

「係呀，啲白頭髮顯得我老之嘛」望住光頭佬，阿飛摸吓自己啲頭髮，打蛇隨棍上，笑住咁講「我係80後㗎， 1984年出世，屬鼠。」

「咦，今年咪啱啱40歲？」光頭佬帶着疑惑嘅眼神，唔係好信阿飛喎。

「41啦，啱啱過咗年吖嘛。」

「41 ？細個我五年，差唔多啦。」

「咁，你都唔似46吖！」

「吓，唔似咩？」光頭佬笑得好開心，以為阿飛讚佢生得後生，唔似46歲。阿飛亦都笑笑口，睇住佢開心，其實心諗：「你唔似46 ，冇晒頭髮，似56啊！」

日子，就係喺呢啲廢話中消磨、消逝……阿飛知道，佢喺上船嘅時候，係嗰位自由自我嘅少年；上岸嘅時候，佢仍然會係當日嗰位少年，無論佢到時幾多歲。抗爭嘅心永遠年青，正如那位一百歲嘅黃伯一樣。

~ 後記：1月10號喺終審劇院，我見到了100歲的少年人黃伯，初心仍在。如果沒有那顆心，人便是一個死人了，不只不再年青，更是一個雖生猶死的人了。你們有沒有發現身邊誰是喪屍？誰是少年人嗎？

大家過年有冇返日本鄉下或者出外旅行呢？如果有嘅話，記得買張Postcard，入去同快必分享你嘅旅遊樂趣同心得啦。特別係仲未寫過信俾快必嘅朋友，唔好怕羞唔好懶啦，寄張卡、寫封信，同快必say hi啦！有時間寫埋比慢必都OK 㗎，一樣可以寄去七姊妹郵箱。

~寫開信嘅朋友，唔好停繼續寫呀。如果好耐冇寫信嘅呢，就快啲加入返筆友嘅行列。

~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！


來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）