成班司局長本周一晚都以工務繁忙為由，全數缺席自由黨黨慶，但事隔一晚突然離奇地得閒，噚晚不單止空群而出參加經民聯一歲生日派對，甚至坐足全晚，包括律政司司長袁國強同政制及內地事務局局長譚志源，或者因為政改三人組領軍人物政務司司長林鄭月娥放緊假，佢哋可以乘機抖吓happy吓。

譚志源好歌喉人所共知，估唔到被指為「剩男」的袁國強一樣係「咪霸」，攞起咪都唱得兩嘴，噚日佢哋就同埋其他局長如勞工及福利局局長張建宗同保安局局長黎楝國，一齊喺經民聯晚宴「登台」，獻唱《紅日》同《獅子山下》，台下嘉賓都話最驚喜係「剩男強」，唱歌時非常投入，有在席人士話「剩男強」未入政府時都好鍾意唱歌架啦，宜家將感情事拋諸腦後喎，自然更奔放啦，笑笑口話《獨自去偷歡》呢啲歌唔啱佢唱咯。

經民聯中好歌之人則係石禮謙，佢唱《What a wonderful world》時有黨支盧偉國吹色士風伴奏，好多人話聽出耳油。可惜經民聯唯一一位女立法會議員梁美芬冇露兩手，話唔定有更大驚喜。


律政司司長袁國強變身「咪霸」，唱歌非常投入。（許偉賢攝）


經民聯盧偉國即席表演色士風。（許偉賢攝）


民主黨劉慧卿（左）全晚勁高漲，更常與經民聯成員上台表演。（許偉賢攝） 卿卿豬豬
http://hk.apple.nextmedia.com/realtime/news/20131218/52004861