「巴打 我留意左你好耐
你真係好幽默
我自問都算個ok幽默既人 但係你幽默感比我真係高十幾二十倍
錯 應該係100倍先岩
估唔到我係呢個post竟然見識到你既威力
我真係笑到爆左肚 依家一路打字一路撿返d腸呀內臟呀腎呀
塞返落個肚到
你有冇諗過未來幾個月去紅館開棟篤笑?」

[古語有云]根據數年前網上流傳旣紅館潮文，作者以「笑到爆咗肚」旣誇張手法突顯冷笑話旣荒謬感。不過今日小弟考古摷返呢段文章出蒞，唔係想做文學賞析，而係想從解剖學旣觀點探究篇文當中旣一個課題︰到底爆咗肚之後，有啲咩內臟會跌出蒞呢？

分析呢段文字前，首先最基本係要介定肚旣位置。腹腔(abdominal cavity)有上下界限作定義，上以橫隔膜(diaphragm)、下以骨盆入口(pelvic brim)為界，中間所有野都係屬於腹部範圍。表面上，腹腔由前外側腹壁(anterolateral abdominal wall)所覆蓋。



基本上，身體前外壁有七層結締組織(connective tissue)，由表至內︰表皮、皮下脂肪(Camper's fascia)、皮下內膜(Scarpa fascia)、三層肌肉組織、膜外脂肪、內膜。响腹壁蒞講，嗰三層肌肉結構就係︰腹外斜肌(external oblique)、腹內斜肌(internal oblique)、腹橫肌(transversus abdominis)。而內膜當然係腹膜(peritoneum)，腹膜呢層組織將會係呢個課題旣關鍵結構。



而腹壁正前方就係腹直肌(rectus abdominis)喇，其實腹肌係左右兩串肌肉組，上接胸肋骨，下接恥骨。腹肌响肚臍、肋骨邊緣、兩者中間旣位置有筋(tendinous intersection)，左右筋旣位置可能會唔對稱，因人、因肌肉操練而異。

前外側腹壁肌肉主要作用係壓縮腹腔以提升腹內壓、轉動或固定軀體，而腹肌就係當中最主要旣肌肉。當人真心大笑嗰陣，腹肌收緊，加強腹內壓，壓逼橫隔膜放鬆、胸腔收細，胸內壓上升，逼出空氣震動聲帶；腹肌放鬆……收放重覆令腹肌紋路顯現，故云「笑到有腹肌」。重覆肌肉運動導致疲累，故云「笑到抽筋」。提升腹內壓壓逼膀胱及直腸，故云「笑到瀨屎瀨尿」，諸如此類。而由於腹肌連接胸肋同恥骨，所以收縮會令腰椎前屈，所以通常會笑到縮埋一舊，仰天長笑旣人一係假裝，一係有較強旣背部肌肉固定腰椎。以上旣呼吸機制牽涉腹部肌肉，故名腹式呼吸法，俗稱氣運丹田。

腹肌由肌鞘(rectus sheath)包住，而肌鞘其實就係由側邊三層肌肉旣筋膜交匯組成。由於筋膜由大量膠原纖維組成，有極強韌度，於是可以响果腔嗰陣頂住消化道漲大而形成旣壓力，响空腔嗰陣維持腹壁原狀。



講完表面，講裏面。咩係腹膜(peritoneum)？想象一下，第一幅圖中粉紅色部分(即係橫隔膜以下骨盆入口以上)，係一個裝滿水旣氣球。一拳窩入去，你個拳頭就會被腹膜包圍，而你隻手腕就形成一條管道，連接拳頭同手臂。呢個氣球叫腹膜內腔(peritoneal cavity)，拳頭係胃(stomach)、空腸(jejunum)、迴腸(ileum)、闌尾(vermiform appendix)、橫結腸(transverse colon)、乙狀結腸(sigmoid colon)、脾(spleen)等等內腔器官(intraperitoneal)，手腕就係帶住血管、神經、淋巴管旣腸系膜(mesentery)。腸系膜令內腔器官可以响腹腔內自由流動，如同你隻手腕可以使你個拳頭於氣球包圍中擺動。而事實上，呢個亦係胚胎成長中消化道臟器成形旣原理。

下左圖畫出咗腸系膜根部(root of mesentery)位置，就好似切開氣球前半，見到氣球後半旣內部，再切咗突出嚟旣拳頭手腕，見到手腕/手臂交界掂住氣球旣位置。响呢層腹膜後面旣器官，响氣球之外，就係响膜內腔之外，有腎(kidney)、腎上腺(suprarenal gland)、大部分旣十二指腸(duodenum)、胰(pancreas)、上行結腸、下行結腸(ascending and descending colon)，為之外腔器官(retroperitoneal)。外腔器官被前面旣腹膜同背後旣大血管、肌肉、結締組織等夾得實一實，唔能夠自由移動。所以，外腔器官係唔會跌出蒞架。可以跌出蒞旣，只會係下右圖有連住腸系膜旣內腔器官。







由於迴腸系膜係最長、摺疊得最多，所以迴腸响腹腔中有最大旣流動性。咁樣係配合返迴腸超過五米旣長度，佔用最小空間。直到迴盲結(ileocaecal valve)附近旣闌尾都仲係處於腹腔內，條尾亦能自由擺動，不過個底就較為固定於盲腸後面。




慢慢返返去前部，啱啱切開氣球前半嗰陣，亦即是將前外側腹壁旣七層結構(包括腹膜)整走後，所見到係圖左上旣狀況。大網膜(greater omentum)係一塊可以揭開旣圍裙，胚胎成長時胃系膜(mesogastrium)由胃大彎(greater curvature)延伸落去，再180度回帶上返蒞，同橫結腸系膜(transverse mesocolon)黏埋一齊。呢塊係充滿脂肪、血管同淋巴結旣圍裙，用嚟隔開腹壁同消化道，作緩衝之用，亦係吸收腹腔液旣大型淋巴回收站。



呢排興犬決，不過有種死刑方式好多人聽過。切腹自盡响日本武士心中，係非常高貴莊嚴旣自殺儀式，代表武士道精神旣極致，唔係阿豬阿狗都配得上切腹旣禮儀。切腹係非常痛苦同對自己殘忍旣死法，因為落刀路徑無經過咩大動脈，主要出血係來自腹肌下動脈(inferior epigastric artery)、胃網膜動脈(gastro-omental artery)同迴腸動脈(ileal artery)，一般係剖開皮肉旣極痛感導致休克而死。切腹者於右下腹落刀，由右至左、下而上而下剖開皮肉，切出半弧形剖口，下面旣腹壁就會自然下墜，迴腸跌出。有啲武士有極強意志忍受巨創，用十文字切方式剖成十字，直接將小腸扯出。右翼文學大師三島由紀夫切腹未能自決，要先後由四個介錯斬首先能自盡。



打咗成晚