Topic語癌)

http://hk.apple.nextmedia.com/enews/realtime/20131227/52032103

依家人人一部智能手機，上網接收資訊基本已成潮流，所以某程度上，網絡影響力比傳統媒體更大，好多藝人喺網上嘅言論，又或者曾經講過寫過嘅嘢，逃唔過網民嘅法眼，經網上流傳，搞到大件事，或者惹網民集體恥笑。今年有2位女歌手---王菀之同鄧紫棋(G.E.M.)就係最好嘅例子。

王菀之上年尾因為想顯示愛心，喺Facebook就立法會討論「特惠生果金」議案時講:「別人在偵探般追蹤梁特首的房子，並從抽絲剝繭得出的新發現大感勝利興奮」時，自己「忘不了每天在盼望多點生果金幫補生活的長者們」。點知就俾網民大鬧佢搞唔清件事前因後果，被指替政府維穩，然後王菀之一句「我討厭政治」，自此就成為網民嘅話柄。

呢件事，仲延續到今年，7月大球場要招呼曼聯同香港球隊傑志友誼賽，不過一片泥濘爛地變成國際笑話，天真的王菀之在fb貼上圖片發問:「點解塊草披咁爛」，一眾網民去到佢fb「踩場抽水」話:「既然你討厭政治，就唔好怨個地爛」，之後王菀之繼續反駁: 「喺有啲人坐喺度不斷評論人嘅時候我背後為社會做好多義工，唔知你又信唔信呢？」

最令人嘖嘖稱奇嘅係，討厭政治嘅王菀之今年10月竟然擔任「基本法大使」，佢當時就話:「我依家都係非常討厭政治…我係討厭政治黑暗、欺詐、明槍暗箭、枱底交易，所以我冇辦法唔討厭，但我唔係唔關心社會，我仲會盡力履行社會責任。」又話政府自己都唔記得咗基本法核心係講「一國兩制」，香港「高度自治」，兜得靚唔靚先?

另一位惹火人物G.E.M.，因為今年喺一本書入面講到對香港民生睇法，直指香港充滿怨氣，特首梁振英肯定承受勁大壓力，有網民見到放咗上網，令G.E.M.頓成箭靶，結果佢篇文亦成為潮文:「見到有人好激烈地反對某些事，或者從早到晚叫特首下台，我反而覺得：『嘩！使唔使呀？』」、「不要去 judge 他做得好不好，我真是好想跟他說一聲『加油』」。搞到網民將佢呢篇文套返落早前佢炮轟商台嘅言論入面: 「有時打開youtube，見到有人好激烈地反對某些事，或者從早到晚話商台唔公平，我反而覺得：『嘩！使唔使呀？』」。