150磅越纖越肥廣告商怒飛苟姑娘

肥苟進化論：（左起）華姐時最索﹑10年開始嚟料﹑今年直頭暴肥。（資料圖片）(資料圖片)

曾經係宅男女神嘅苟芸慧（苟姑娘），今年因為同天王郭富城爆緋聞而人氣急升，雖然工作不斷荷包腫脹，但佢嘅體重亦成「正比」急劇暴升，已到咗一發不可收拾地步，外界稱呼佢做「肥苟」。

猶記得苟姑娘喺09年參加國際中華小姐時，樣靚身材正，當時體重亦得115磅，索到爆，最終苟姑娘成功奪后冠。然而經過四年嚟洗禮，苟姑娘身形越來越脹，佢近日出席活動時，仲死撐話會積極減肥，又話可能最近成日出席活動，大家見到佢唔覺得身形有乜分別。

言猶在耳，今日有報道話苟姑娘體重已達150磅，腰粗躉大，臂壯面圓，雖然上圍仍有睇頭，但可惜腰肢及下圍同樣肥得驚人。更甚嘅係，佢身為纖體公司代言人，竟然「越纖越肥」，變相「倒米」拆人招牌喎，有見及此，纖體公司決定收起有關苟姑娘瘦身廣告，仲改由樣靚身材弗爆嘅劉心悠頂替。除咗纖體公司詐晒型外，報道仲話有傳無綫出聲要苟姑娘減肥，下令佢閉關一星期減十磅，不過苟姑娘否認收過「減肥指引」。

點都好啦，苟姑娘真係要諗諗點樣減肥收身先得，否則都幾頭痕。有人話，既然龍小菌生得咁似苟姑娘，而且又成功減磅變番索女，咁不如兩個「苟姑娘」齊齊瘦身打boxing，可能仲帶挈埋廣告商添。