http://hk.apple.nextmedia.com/enews/realtime/20140103/52054367

韓國娛樂圈近日傳出令fans震驚嘅拍拖消息，韓國人氣男星李昇基被多次偷拍到駕車接載少女時代（少時）成員允兒外出相聚，兜風遊車河傾心事，戀情曝光，即雙方經理人公司承認，佢兩個已經拍拖四個月。

大前晚允兒隊友秀英上節目，被追問有關允兒嘅戀情，秀英原本尷尬咁話：「這也要說嗎？」之後佢都乖乖咁話：「你也祝福她吧？是嗎？大家對她都很好，非常看好這段戀情。而我也感到十分自豪。」話就話明撐隊友，眼睇以為佢好鬼有義氣，唉，點知原來係為自己鋪路。

隨著秀英、男星鄭京浩一輯又係於停車場偷拍、男方輕擁秀英纖腰嘅相片曝光，少時所屬嘅SM娛樂，今日公開承認秀英同鄭京浩嘅情侶關係，但幾時開始就唔肯講。

其實秀英同鄭京浩已先後於舊年2月同10月傳出緋聞，當時雙方經紀公司仲死口唔認，話兩個人係通過教堂認識，但只係前後輩關係，認為緋聞唔係事實，覺得荒唐云云。不認不認還需認呀。

其實鄭京浩喺去年9月退伍之後，演出MBC廣播節目《神童的深深打破》時，都有透露緊自己拍緊拖，但當時經紀公司就話鄭京浩係同圈外人交往，查實嗰個「圈外人」，咪就係秀英囉。

今日兩人戀情再經報道之後，SM娛樂終於肯承認秀英係同鄭京浩相戀一事，並補鑊話：「我方確實對此過於小心。希望大家多多祝福他們。」橫掂允兒都認咗囉，唔爭在認埋秀英啦。

其實，鄭京浩同秀英拍拖時，都要好小心好小心；睇埸戲都要重重偽裝，管接管送都要小心翼翼。即使如此，兩人去年仍一齊過咗個好甜蜜嘅聖誕節，鄭京浩親自前往狎鷗亭百貨裡面嘅CHANEL專櫃揀禮物俾秀英，冧死啦。