■林穎彤喺劇集《熟男有惑》中話請假去韓國整容，跟住攞住平板電腦顯示嘅少女時代（左圖）靚相，劇情俾人投訴影射。電視圖片


由郭晉安、李思捷、單立文同曹永廉主演嘅無綫新劇《熟男有惑》，俾人話似足張東健主演嘅韓劇《紳士的品格》，雖然上周第一集高開29點平均收視（約186萬觀眾人次），不過成個星期拉勻平均收視只得26點（約167萬觀眾人次）。套劇收視唔高，不過投訴就勁多，通訊事務管理局噚日接到有關《熟男》總共79宗投訴，話劇中影射某外國歌星組合，有誣衊他人之嫌，又話套劇欠新意同抄襲。加埋無綫接到7個觀眾投訴，唔滿意諷刺他人整容，共有86宗投訴。


監製死撐：冇話整容
原來，上周三《熟男》有幕劇情辣到韓國人氣組合少女時代，話說扮Ugly Betty嘅林穎彤話就話飾演李思捷秘書，實質係幫李思捷老婆李詩韻贒實老公，林穎彤想向李詩韻請假兩個月去韓國，跟住攞住平板電腦顯示嘅少時靚相話：「我係去整容。」李詩韻怕林穎彤變靚令老公嗒糖，所以即刻炒咗林穎彤！估計呢段情節，令少時fans覺得套劇影射偶像而投訴，不過監製林志華噚日喺電話中解釋：「我哋係話佢想整到佢哋咁靚，冇話佢哋整容，只不過係話林穎彤想變靚啲啫，唔好誤會。」

http://hk.apple.nextmedia.com/entertainment/art/20130625/18310774