http://hk.apple.nextmedia.com/enews/realtime/20140118/52103446

「小巨肺」G.E.M.(鄧紫棋)參加內地湖南衛視節目《我是歌手2》，面對一眾有實力歌手包括張宇、曹格、周筆暢等，其唱歌水準依然冇甩拖，唱改編歌《你把我灌醉》嗌爆咪，成功攞到第一，鏡頭前仲見到韋唯聽到O晒嘴。不過韋唯噚晚一集嘅成績都真係令人O嘴，包尾。佢喺微博寫道:「當我聽到第七名的時候，有一些驚訝，但是靜靜的思考後覺得，好像張杰、周筆暢這樣優秀的歌手，在這個舞台上馳騁，《我是歌手》將會更加精彩。我為她們驕傲，也為華語歌壇驕傲。」

噚晚嗰集，G.E.M.就攞第一，羅琦奪得亞軍，而補位歌手張杰以一曲《勿忘心安》就得季軍，韓磊則第四名，盛傳上台前哮喘病發嘅周筆暢第五名，既是主持又係參賽者嘅張宇只得第六名。死啦，會唔會真係張宇出局0架？但亦有傳孕媽媽羅琦因為身體不適，將會退出喎!

噚晚嗰集，全場另一亮點係曹格返場……佢唔係回歸比賽，而係返場表演，獻唱《Greatest Of Love All》，又係套用呢四個喺微博形容《我是歌手》參賽者嘅水準——「技驚四座」，fans們繼續以其未知是真心定係好pay嘅表情為其振臂高呼。仲訪問咗佢幾句，曹格話是夜太太都有到場撐佢，之後又笑自己冇比賽緣，寧願專心錄新碟，秋季發行。

雖然G.E.M.實力非凡，但有傳林憶蓮將會參加，不過條件要叮走G.E.M.，憶蓮日前出席活動，佢都有澄清呢件事，因為檔期唔啱，所以婉拒參加呢個比賽，憶蓮仲話好欣賞G.E.M.呢位新晉女歌手。呢幾日憶蓮喺微博同fb上都俾G.E.M.嘅歌迷鬧到暈，當中絕大部份都係人身攻擊無的放矢針對憶蓮嚟鬧。其實各有捧場客啫，使唔使對傳聞咁認真呢？

講到出局，其實網上已有傳聞話出局嘅係韋唯，而替補歌手係大馬歌手品冠，第五集就會登場，演唱《掌心》。至於嚟緊第四集，G.E.M.會唱范曉萱嘅《我要我們在一起》，據知佢亦將順利殺入第五集，選唱Beyonce《If I Were A Boy》。周筆暢就揀咗學友嘅《慢慢》，張宇就選唱周杰倫復古曲風《迷迭香》、張杰演唱《Black Or White》。成兩個禮拜之後嘅事，依家講都太早。但係，點都要講埋呢句……《我是歌手2》影住嗰班觀眾，表情真係真係真係太浮誇，好難頂。