http://hk.apple.nextmedia.com/enews/realtime/20140118/52103610

王菀之話過「我討厭政治」，不過未必個個都係咁諗。電影公司老闆黃百鳴中午就出席咗幫港出聲嘅籌款記者會，宣佈賀歲片《六福喜事》喺28號舉行嘅首映係幫佢哋籌款。

監製黃百鳴喺會上話自己唔係幫港出聲嘅成員，不過就認同佢哋反佔中嘅睇法，又話中環就好似香港嘅心臟一樣，一個人有咩問題可以去整容，隆胸、洗腸搞乜都好，但係心臟唔搞得，因為一搞可能就會瞓低。

佢又話只要和平、和氣、合理同合法自己就會支持，亦都唔擔心部戲會因為自己嘅取向而有影響。

講到演藝人協會選新會長嘅是非，佢就話自己唔係會員，亦都冇乜留意秋生同陳芷菁之間嘅糾紛。身為電影製作發行協會理事長嘅佢又話，唔方便干涉人哋嘅會務喎。