http://hk.apple.nextmedia.com/enews/realtime/20140120/52109464

問：「點解Eason冇獎攞嘅？」
答：「TVB同佢間唱片公司唔啱呀嘛」
問：「又話一人一票嘅？」
答：「你0依家明點解冇提名權就冇真普選啦…」

三個幾月前TVB就大肆宣傳《2013年勁歌金曲頒獎曲禮》會實行全民投票，選出大家各獎項心水得主。噚晚賽果終於揭曉，得獎名單一望落去就發覺好得「異」，真係好得「2」，係異常簡潔，因為得獎歌手來來去去，都係嗰幾位輪住攞，同埋得獎歌手大致可分2類，係英皇歌手同「巨聲幫」出身嘅歌手。

翻看候選名單就發現，大會可提供投票嘅歌曲同歌手，一早已經篩選好，等大家冇乜機會可以揀到其他同TVB傾唔埋，或暫未傾掂嘅歌曲或歌手。所以，莫講話觀眾睇到嗌悶、覺得點解好似成晚不停重播咁；就連台上參選歌手，都顯得好唔自在。去到中段，已經有唔少歌手魂魄唔齊咯!

講到全晚大獎「最受歡迎男、女歌星」，大會畀足時間大家投票，仲可以隨心水去更改，最後兩個獎錄得總投票票數係95227票，即係夾埋10萬票都未夠。自由度咁高，兼且咁多時間畀大家投票，票數都係咁低。

謝安琪雖然已經同電視台破冰，可以入圍呢個獎，但最後都係贏唔到容祖兒，祖兒毫無懸念第九度奪得最受歡迎女歌手獎；男歌手方面，冇咗陳奕迅、周柏豪、古巨基及張敬軒參賽下，雖然仲有31個候選單位，但計來計去，還是林峯同上位甚快嘅許廷鏗之爭。有網民認為今年可以頒畀許廷鏗，始終鏗鏗今年成績真係幾好，但亦有網民又認為太快頒畀許廷鏗嘅話，好似揠苗助長咁，甚至會累咗佢。不過唔揀佢兩個，唔通真係要頒畀小肥甚至係黃宗澤？真係有得揀？

一日未破冰，一日都派唔到歌上去，亦一日都冇獎攞。呢個死結，何時能解？亦有人話，無綫今次就係示範咗一個活生生例子:有篩選嘅選舉之可怕。就好似本文開首所講，冇提名權，就冇真普選。