http://hk.apple.nextmedia.com/enews/realtime/20140125/52125843

王力宏同太太李靚蕾新婚已兩個月，除咗掀起一連串是非之外，就連佢老婆李靚蕾都即刻被起底，話佢係中日混血兒、十年前係一名辣妹，好鍾意夜蒲，又曾經同前男友訂婚，但王力宏一於少理，同李靚蕾閃婚後，過住甜蜜生活。

日前，王力宏不滿佢哋幫襯訂喜餅嘅公司，喺未經王力宏同李靚蕾同意之下，擅自將佢哋嘅相片發放畀媒體，而且仲喺facebook上載禮卡相，以作宣傳效用，搞到王力宏好鬼激氣，一怒之下，堅持退回200幾盒喜餅。

王力宏經理人劉鳳琴直斥呢間喜餅公司好過份，佢話：「喜餅公司多次答應不主動發稿，不透露跟產品無關之細節，但卻擅自接受媒體訪問，並且在未經同意和授權之下將私下製作的禮卡提供媒體拍攝，甚至於該店臉書粉絲團公開發布禮卡照片。」王力宏決定向另一間訂貨，寧願賠錢，粗略估計損失50萬新台幣(約近13萬港元)。

之不過，依家事件演變成羅生門，王力宏一方認為該店借藝人名氣做宣傳、擅自披露藝人私隱，但造喜餅嘅業界對王力宏此舉亦不敢苟同，發聲明稿中語氣強烈表示：「王先生所屬經紀公司因媒體報導不盡其意，強硬要求退貨退款，甚至為了表達不滿，惡意退貨至店門口，但卻因與法律不合被警察要求收回。王先生經紀公司的行為令人錯愕並惡質，隨意不滿而退貨的行徑如同惡霸。」而該喜餅店亦表示，當初會俾王力宏優惠價，就是因為雙方簽訂合約都同意宣傳。

對此，王力宏經理人再度反撲，指簽訂合約同意宣傳一事根本子虛烏有：「我們沒有和他們簽合約，請他們把合約書拿出來。」對於業者形容王力宏方面強行將喜餅退貨至店門口，行為「如同惡霸」，王力宏經理人強調：「我們後來有拿走了。」其經理人公司亦指出:「對於店家處理不當在先，還顛倒是非，作出公然侮辱消費者的聲明，本公司至感失望與遺憾！」