官恩娜因為於報章撰文提到「包容」中國人，觸及香港人痛處，故大加撻伐，紛紛於官恩娜嘅fb留言痛罵，指摘其屬「離地中產」，不知內地人為香港人帶來之痛苦及傷害，亦有網民指官恩娜屬大溪地人，何以能持特區護照，官恩娜今日於機場出席禮物捐贈活動時，已表明自己係喺法屬波利尼西亞嘅大溪地出世，但佢冇揀法屬passport，而係選擇拎香港特區護照，當中並無任何隱瞞。

至於何以能選擇特區護照？官恩娜表示:「因為我爹哋媽咪都係香港人，我兩歲時返香港宣誓中文名，我自己選擇咗用特區護照。」講到呢度，官恩娜已開始喊起嚟。

傳媒問官恩娜是否因為被質疑身份而唔開心或覺委屈，官恩娜謂:「質疑身份就唔委屈。」講完呢句，官恩娜嚎啕大哭起來。

官恩娜一邊抽泣，一邊謂:「我喊呢，到時又話我做戲0架喇。」之後再話:「我明白佢哋點解咁嬲，但我係我講嘅係生活上嘅小禮儀，唔係講緊一啲，要佢哋接受人哋隨街大小便、攞晒佢哋啲學位、食晒佢哋啲奶粉、搶晒啲床位……」講到呢度，官恩娜更是難以自控痛哭。


官恩娜話明白大家點解咁嬲。