http://hk.apple.nextmedia.com/news/art/20080314/10863965
英國駐港總領事柏聖文（ Stephen Bradley）下月卸任，由於好快就可以起身走人，柏聖文噚日響惜別午餐會上盡訴心中情，大彈特區政府冇搞好文化同保育，自爆得悉皇后碼頭要拆時好火滾，曾經向下屬建議由佢親自出馬，揸架插住英國國旗的 Jaguar遊艇去中環海面抗議，甚至學其他保育人士咁，自縛皇后，以示嚴重抗議特區侮辱女皇陛下同香港歷史。
佢一臉無奈咁話，可惜領事館入面有好多理性同事勸阻，佢惟有打消念頭，唔可以一縛成名。柏聖文講到似層層，繼續吹水話對傳媒唔住，仲為記者失去採訪一單大新聞黃金機會而道歉，不過佢聲言，大家要怪就怪佢同事，唔好鬧佢。

指英文水平顯著下跌
踩完港官冇文化、唔重視保育，佢又狠批港人英文水平每下愈況，佢話任內四年不斷有人問佢呢個問題，作為外交官，佢用外交辭令回答港人英語係下降緊（ declining），臨別在即講句真話，港人英文水平其實係 significantly declined顯著下跌，長此下去，想做「紐倫港」都幾難。