http://hk.apple.nextmedia.com/enews/realtime/20140128/52137460

今晚Cool魔張智霖喺維園年宵市場舉行新碟簽名會，因為佢公司老闆係蕭定一，難怪佢個攤位就係同人民力量一齊。如前所述，塞死晒大批fans等簽名同爭睹Cool魔型樣，此時人力主席袁彌明忽然企上條梯大嗌:「撐普選!」Cool魔聞言亦大嗌:「撐普選，梗係要撐啦!」

Cool魔一上台，全場起哄，佢話:「我其實年年都有嚟行㗎，市民對我都好友善㗎!」公司亦落重本，大派風車、以及有佢個樣嘅海報同揮春等等，Cool魔亦即場丟俾fans。

話晒係首名藝人喺維園年宵市場搞簽名會谷唱片，Cool魔猛話好開心:「現埸真係好熱鬧!首批近一萬張已出晒貨，2月18日盡快再出第二批啦。今次真係好好成績，為我嚟緊嘅演唱會打咗支強心針。」

但提到全碟八首歌都係翻唱，是否有壓力？佢話:「開頭有，驚有比較，好似唱《歲月如歌》咁，幸好最後睇番啲評價都係正面嘅。對我嚟講以唔唱衰人哋首歌為目標啦!」真係好鬼謙嘅啫!

Cool魔又表示，好多謝公司咁愛戴佢，自言馬年係一個好開始。至於會否同囝囝「魔童」一齊行花市？佢話會喎:「唔怕亂，其實花市係流水式，唔可以停留，啲市民見到我哋，都係好友善咁say hi。」佢又話今年封利是會大封啲，仲會派多啲添!「快樂係要同人分享先得0架嘛!」Cool魔真係抵錫喇!