做樂壇小強有咩條件？1）面皮夠厚，2）要疊水，3）有生存意志，心跳未去到零都唔可以放棄。究竟呢十隻小強因乜解究可以有咁頑強既生命力，係呢個一潭死水既樂壇生存超過十年百載？係Discovery Channel 未開拍樂壇小強特輯之前，瓊姐同你解構下呢十隻生命勇士。

1）區文詩（Angela）出道年份：2002
餅碎區文詩係2003年，即Cookies出道一年後，已經被叮走，點知死唔斷氣，去到2012年仍有人出錢幫佢出歌拍mv。唱功平平，唔識跳舞，又無身材，更遑論其外貌，竟然仍能生存超過十年，堪稱零食奇案：原來餅碎係無過期既一日，應該去消委會查詢下。

2）王梓軒（唔知咩英文名）出道年份：2009
貴為港區全國人大代表、香港藝術發展局主席王英偉之子，王梓軒生存能力無容置疑，無一首歌up得出名，都可以係九展開演唱會。一曲＜跳火坑＞更成為近期網絡笑柄。

3）關楚耀（Kelvin）出道年份：2006
藏毒案後以為會退隱樂壇，點知面皮厚度以英呎計，死lur唔走，久唔久又會係個水渠度鑽出黎，爬去各大電台宣傳新歌，又拍電影，以為自己好紅，簡直不負佢契爺譚伯「第一代樂壇小強」之惡名。

4）鍾欣桐（Gillian）出道年份：2001
小強係黑色既生物，黑色亦都係象徵打不死既精神，所以明眼人都知阿嬌老是常出現，生命力超強，最近仲出國語碟＜桐鮑＞，喻意佢可以好似d強國蝗蟲同胞，做隻打不死既生物，近日仲成日係老麥見到佢既蹤影添。

5）張繼聰（Louis）出道年份：2005
曾經高唱「若是月入二千以下，都想唱作直到，毫無新歌可發佈」，明明今年靠拍劇翻生，點知仍然留戀樂壇，錄音出新歌，生命力驚人，久唔久又會去勁歌金曲打個白鴿轉，唔怪得作首歌叫＜生命之花＞。其實你老婆自2009年之後收入都猛猛緊啦，仲要人地養你，知道醜字點寫嗎。

6）Big Four 出道年份：盤古初開
其實呢4件騎呢蘇，加埋成400歲，樂壇人瑞嬅嬸都唔夠佢揪，仲有面皮行出黎獻世，4個人明明號召力有4倍，都係開得果幾場紅館show，4小強當中生命力尤以梁漢文最為驚人，2003年憑七友拎大獎曾經話自己「鯉魚翻身」，但呢條鯉魚而家已經反晒肚，仲變埋人人討厭既小強，恨不得用黑旋風噴死佢。

7）鄧穎芝（唔知咩英文名）出道年份：2004
樂壇小強之母，賓妹造型深入民心，有「核幅射版鄭融」之稱。可能經核幅射影響，生存能力令世人讚嘆。全港能夠唱出其名曲的市民不出一百位，比歷年中六合彩頭獎的人數還小，但到2012年還有新歌推出，頑強的生命力引起生物學家研究之興趣。

8）吳彤（Who ing Cares）出道年份：好耐之前
唔同呀？睇過？同其他小強有咩唔同？之唔係佢係一隻gay既小強，可惜出櫃消息一出，無人想知無人想理，只係佔娛樂版既其中一忽暗暗小角，無人知佢出過咩歌，亦無人想知，只想買間曱由屋比佢過埋下半世。

9）官恩娜（Ella） 出道年份：2005
曾經有幾首算係有d人識唱既歌，可惜後勁不繼，收過皮一排。但自從2009年欄左上去超級巨星唱endless love之後，又比高登班毒男捧番上天，但其實善忘既高登仔咪又係捧得果幾日，過一排又唔記得你。但呢隻大溪地小強仍然覺得仲有好多人好想聽自己唱歌，而今年plug果幾首歌都收晒皮。其實唱左9年都仲係三線，你不如放棄啦。

10）阮民安（Tommy）出道年份：2002
已經同樂壇小強呢個尊貴既名字畫上等號既tommy仔，生命力猶如用上金手指，hp 9999，仲不斷同韓國小強gay dragon 合照上報，面皮厚度足以令研究地球板塊的學家驚嘆，其身體構造，生命意志力已經唔係其他小強可以言語，無論比人點鬧，仍然堅持生存係呢個樂壇，至尊小強呢個名，唔係你仲有邊個？

其實樂壇小強部隊仲有好多成員，可惜其他小強既知名度實在低到連瓊姐我都唔敢打出黎，費事大家睇完都唔知講緊邊個，所以就此列名，還各位小強一個名份：麥家喻、方皓玟、李卓廷、Kellyjackie、龍小菌、梁又嘉

文：瓊姐