http://nextplus.nextmedia.com/news/latest/20170721/531895

回歸二十週年，習總訪港，唔少地方變到大陸一樣，四處掛起國旗，到底有幾多人真心慶回歸？環保團體項目統籌古偉牧，最近就出咗本新書《有冇人熱烈慶祝香港回歸祖國二十年》，但最後竟然都疑似因政治敏感，搞到大書店唔肯賣。

本書訪問咗回歸廿年來每年嘅關鍵人物，有本民前梁天琦、反國教嘅黃之鋒、亦都有金管局前總裁任志剛呢類唔「黃」嘅人物。但唔知係咪題材敏感，嚟自台灣嘅誠品書店話賣又唔賣，聯合出版集團旗下嘅「三中商」更加唔使講，唔賣！

古偉牧就話，曾經出過訪問雨傘運動參與者嘅《被時代選中的我們》，誠品都有賣，估計今次有人擔心有麻煩而唔賣。佢認為今時今日嘅香港，政治因素係一個最大嘅商業因素，「政治唔鍾意一樣嘢，會帶來好多商業壓力。」

書中特登搵啲跨顏色、跨界別、跨政治立場嘅人物做訪問，其實係不分立場咁幫讀者睇返回歸後發生、可能仲影響緊香港人嘅大事，好似「領匯事件」咁。本書只得樓上書店有售，但留意返，今日書展開幕有售，有興趣可以去買嚟睇下。