http://nextplus.nextmedia.com/news/spot/20171111/558177

剛剛過去星期日乃跑馬日，馬場貴賓廂房除咗傾馬仔，仲零舍多人傾另外一個話題，就係上星期首富李超人罕有出現馬場廂房，仲要帶埋佢位金叵羅大孫女李燕寧出席，吸睛程度勁過樓下拉頭馬班馬主。

事關李首富家族經歷大富豪一役，變得極度注重私隱及安全，平日見人都成班保鑣圍住，第三代返學亦有保鑣跟隨，正式陪太子讀書。平時第三代放假亦鮮有喺香港四圍去，出外食飯都只係去長和旗下嘅酒店居多。以往每年全家去拜祭超人亡妻，第三代都戴晒口罩，樣貌從未曝光。今次發現大孫女原來咁省鏡，打入女神榜睇怕無懸念咯。

查實呢張爺孫相有景轟，因為明顯唔係偷影，而且好多媒體都有，坊間盛傳乃超人好友流出來，但試問邊會有超人好友咁沙膽，未得佢老人家首肯便些牙開去，故此發相人是誰依然木宰羊。

後來又有超人針話孫女未入過馬場，所以阿爺帶乖孫去見識吓，根本冇約任何人喎。有口痕友就話，大孫女今次曝光似乎早有準備，不排除將來會再有機會露面，鋪路俾第三代加入公司。