https://hk.news.appledaily.com/breaking/realtime/article/20180621/58347443

天時暑熱，好多人都唔想幫襯大牌檔，但咪以為畀多啲錢去大酒店就冇事，因為即使燒鵝嘅價錢，亦可以係蔗渣嘅待遇。好似讀者鄭女士嘅囡囡咁，喺九龍香格里拉酒店參加謝師宴，竟然遇着壞冷氣，結果成晚滴住汗咁食。

鄭女士嘅囡囡喺葵涌李兆基中學讀書，剛剛考完DSE，昨晚喺九龍香格里拉酒店舉行謝師宴，每人盛惠700大元，鄭女士話，要使咁多錢去謝師宴，已經覺得好貴，但因為係全級嘅盛事，所以都照樣畀錢囡囡參加，估唔到囡囡一去到，酒店就通知佢哋，冷氣壞咗。

鄭女士最嬲嘅係，酒店一早知道壞冷氣，點解唔通知學生改期或者取消，認為咁做係恰細路，「唔係食食吓先壞，根本就係恰佢哋唔敢出聲」。雖然酒店搬咗部流動空調頂住檔，但囡囡話作用唔大，用手機程式量度，現場氣溫高達30℃，連布甸都熱到溶，「衰過去大牌檔，去茶餐廳食都冇咁嬲」。

而網上亦都流傳一批相同短片，聲稱係酒店冷氣機房嘅情況，短片入面嘅場景，相信係冷氣機房，啲水不停湧出黎，水深蓋過腳眼，兩位相信係酒店嘅職員喺現場，其中一位着住黑色西裝，表現緊張咁話「冷氣……冇喇冇喇」，而其中一張相就見到，水流不停由一條爆裂嘅水管噴出，受水浸影響，雜物都沖到亂晒。

網上又流傳酒店公關部發出嘅內部指引，原來壞冷氣係因為水力供應故障，導致全酒店範圍嘅冷氣亦停止，仲話酒店會提供新鮮空氣，強調運作如常，網民鬧爆呢個天氣冇冷氣，根本唔算正常運作，認為今次係一場公關災難。記者向酒店查詢，但就一直等唔到佢哋嘅回覆。

小記今日親身去感受吓，發現大堂依然冇冷氣，但係溫度都係比室外烈日當空低，體感應該大約27、28℃左右，人流就明顯比平時少，有坐喺大堂嘅客人熱到用紙撥涼，小記行咗幾圈，都唔見有壞冷氣嘅告示。

內地旅客楊先生話，原先住喺酒店高層，前日中午開始冇冷氣，酒店安排佢調去低層房，房入面有微弱嘅冷氣，但仲係覺得熱，楊先生聽職員講，話經過搶修後，酒店只有四分之一嘅冷氣運作，低層情況比較好，至於酒店有冇賠償，楊生就話唔方便講喎。

黎先生嘅印尼朋友一家五口租咗兩間房，打算住兩晚，點知第一晚返到酒店發覺冇冷氣，佢哋噚日朝早見到有好多住客退房換酒店，但因為黎生嘅朋友只係住兩晚，所以都唔想咁麻煩，而酒店每間房每晚送1,000蚊餐券，但因為酒店嘅餐廳一樣冇冷樣，黎先生覺得朋友收到嘅餐券都未必用到，「好失望呀！五星級酒店嚟㗎，佢哋本身打算住得舒服啲」，黎先生認為酒店應該賠償。