https://video.appledaily.com.hk/mcp/encode/2018/10/11/3711288/20181012_sub721NEWNEWAD_clean_w.mp4


陳笑洛字畫雙絕，高手在民間。

香港人，窮則變，變則通。漫畫彩稿師落到廟街，寫書法賺錢，畫水墨畫吸客，一幅水墨風異形吸引大量外國人注目，更開價數千元想買下，陳笑洛：「不過我冇賣呀，每幅畫都係心血，想搵到真係識欣賞嘅人先賣。」係型嘅。

在廟街打滾，要靠朋友。「呢啲檔口平均幾千至一萬租，不過好多朋友叫我唔使租，佢哋放假個檔口就我用，請吓食飯飲酒就得。」所以陳笑洛在廟街是打游擊，檔口可能日日不同位置，大約晚上七時開檔，「每單生意過程只係幾分鐘，細幅一百蚊，大幅啲就賺到五六百蚊，有啲客大方啲仲畀貼士，可能已經差不多一千元，夠飲酒、食飯，小朋友都有飯食。」訪問當日，親眼目擊，一位叫Adams的外國人要寫大大幅中文譯名「亞當斯」，再加一個好玄的圓形圖案，五分鐘，六百蚊，Adams還相當滿意要握手要合照。

工作時工作，畫畫時畫畫，很多遊客找他寫大字，短短五分鐘就賺到幾百一千，真材實料，童叟無欺，「寫名囉，多數外國人都想寫中文名。」我想起外國人紋中文字的fail事件簿，「所以我用電話translate，你入英文名，我篤一篤，出中文字。」其實，你知道嗎？Google translate都出過很多笑料……


就是這幅水墨風格的異形，吸到fans、吸到like。


早幾天又技癢，畫了這水墨風格蝙蝠俠。


訪問當晚即場揮毫，《鐵血戰士》的血獸。


這幅關公，陳笑洛說用了十幾分鐘畫好。


每次開檔，也會掛出這幅「榮辱不驚」提醒自己。

封面大師　後搞生意再寫字
一九九七年在大一藝術設計學校畢業，之後投稿玉皇朝，「嗰陣請我做彩稿，跟住就有得做封面，初時做《街頭霸王》，即係許景琛嗰本，再之後就去咗做《拳王》，最後做過《刀．劍．笑》、《李小龍》封面。」原來是封面大師，不過陳笑洛似乎沒有一般入行實現漫畫夢的目標。「做到二○○三至二○○四年，我覺得漫畫圈已經有啲走下坡，加上外面都有啲畫畫工作，咁自己諗不如跳出嚟搞生意，於是籌咗啲錢就開咗一間時裝舖。開頭都係入貨賣，賣吓賣吓又幾好生意，之後又試吓喺啲牛仔褲、Tee上面畫畫，千幾二千一件都有人買喎。不過始終產量好低，因為畫畫真係需要好多時間。」之後輪到網購興起，生意開始差了一點，「先喺觀塘廣場，之後就落嚟廟街開檔，不過當時開始乜都有得網購，我就諗，要賣一啲獨一無二嘅嘢，但畫畫又太耐……咁我之前畫封面都有寫書法字，不如寫書法啦？最記得嗰日，我買咗一支筆同一支墨水，喺檔口後面掛啲書法作品出嚟，就已經有個外國人嚟問係咪可以寫字？我心諗有冇咁蹺呀？唔通注定我要轉行？」就是這樣，上年十月，正式開始在廟街寫書法，「啲外國人最鍾意，『神』呀，『爸爸媽媽』呀，『我愛你』呀，就係咁，第一次用書法賺到錢。」

破格書法　「離唔開畫畫」
陳笑洛有兩個兒子，一個十三歲，一個十一歲，四十多歲的他要搵食，所以第一件要考慮的事，是利潤，即是錢。「我哋要搵食，搞藝術呢啲留番得閒先搞啦。寫書法搵錢最快，寫喺紙上面，寫兩寫就搞掂，冇畫畫咁需要時間，又冇壓力。」一技之長喎？「我都有諗過畫人像，但一來時間長，二來，你知啦，畫得似唔似好主觀，到時遇到啲客唔滿意都幾煩，但寫字冇得話唔似嘛，係嗰隻字就係嗰隻字，除非我寫錯字。」檔口還有不同字款供客人選擇。

實際一點，短短兩小時都有兩個客賺了接近一千蚊，真係爽？「唔計搵我預訂寫字同畫畫嗰啲客，平均街客一晚搵一兩千蚊，不過有時都會得幾百，有時或者落雨咁，都會食白果嘅。」客源都是外國人？「外國人多數要一百蚊細細幅留念，大幅就多數係香港人要，可能掛喺舖頭，可能掛喺屋企。」其實我小學都練過「上大人孔乙己」，「我寫嘅書法其實同傳統有啲唔同，好似畫畫咁，偏向藝術字多啲，我會自己創一些字體，寫一啲比較特別啲，破格啲嘅，我嘅書法，離唔開畫畫。」


開工架生︰毛筆、墨水、紙。


現場看過就會知道陳笑洛的畫技，不用起稿自是最強。


早前更吸引到外國記者採訪，不過竟然沒有問是哪間傳媒。


這是陳笑洛繪畫的牛仔褲。


畫畫寫大字有時都會引來遊客圍觀，相中右一就是「亞當斯」。

朋友慫恿畫異形　引來外國客人
陳笑洛：「每次畫畫，都會引到多啲人埋嚟睇。」早幾天還引來外國記者採訪拍片，有拍片費收。雖然他沒說出口，但其實一個畫得一手好畫的人，拿起毛筆怎會不想畫畫。「畫畫係得閒先畫，無聊先畫，因為得一支毛筆，所以就開始畫水墨風格嘅畫。」我就是在他的facebook看到一幅水墨風異形，才想到要訪問他。「係個朋友叫我試吓畫，估唔到咁好反應，掛喺檔口好多外國人都問。開心嘅，我畫得開心，又有人欣賞。」早幾天，他還畫了水墨風蝙蝠俠，今晚我們亦預備了特別任務，讓他畫完異形畫《鐵血戰士》的血獸，繪畫時間斷斷續續用了約兩小時，為何斷斷續續？因為期間做了兩單生意。「有啲收入，得閒又可以畫畫，其實做人都幾開心，哈哈哈哈。」

採訪：陳孝義
攝影：劉永發

source : https://hk.lifestyle.appledaily.com/lifestyle/special/daily/article/20181012/20520091
+++++++++++++++++++++++++++++++++++++++++++++++++++++++++++++++++
咁好搵