HKGalden時事臺
發表文章發起投票
《獅子山下》重現「被失蹤」內幕假.林榮基 講古佬風骨



https://video.appledaily.com.hk/mcp/encode/2018/10/21/3716585/20181020_ent_333NNAD_mp4_GoogleAccessId_onemcpad_w.mp4


在《獅子山下》單元《定風波》中飾演林榮基的阮志雄,眼看香港言論自由被衝擊,自言覺得害怕,但他認為是健康的情緒。

講古佬「雄仔叔叔」阮志雄演出港台劇《獅子山下2018》首集《定風波》,故事改編自銅鑼灣書店店長林榮基被失蹤的經歷。導演陳上城找上阮志雄演繹林榮基,從外形到造型,連認識林榮基友人也認錯人,神似度令人讚嘆。對於這個敏感人物的角色,阮志雄坦言:「啲嘢越來越埋身,我哋面對操控性嘅政權,條紅線就越來越前。」

採訪︰羅婉玲
攝影︰仇志德

經常為小朋友、為別人說故事的阮志雄,今次轉換方式,透過他的演出來說別人的故事。阮志雄為港台演出劇集《獅子山下2018》首集《定風波》,劇集講的是極為敏感的銅鑼灣書店事件,阮志雄在劇集重現銅鑼灣書店店長林榮基在拘禁期間返港,掙扎是否要將讀者紀錄交出的三日兩夜,外形瘦削、戴眼鏡的阮志雄,確實跟林榮基有幾分相似。

阮志雄前日接受《蘋果》專訪,他說︰「林生嘅新聞我當然有睇,不過今次唔需要跟足佢嘅行為舉止嚟演。有一晚喺書店拍攝,間書店老闆娘認識林生,有個鏡頭要我行落樓梯,老闆娘見到我以為我係林生。拍之前我同林生見過兩次面,雖然佢有咁嘅經歷,但其實佢個人好活潑。」

第一次拍劇的阮志雄直言,其實覺得自己不適合做演員:「之前都有做過吓演出,發覺自己唔適合做演員。導演陳上城搵我,話我唔係一碌木,佢會指導我去演。」最初阮志雄答應演出時,沒想太多︰「我冇諗得太複雜,我係有擔心,擔心演得唔好破壞咗套劇,其實唯一擔心自己身體唔係咁好。」


《獅子山下》重現銅鑼灣書店事件,但亦令到不少團體不敢借出場地拍攝。劇照

聞被困「好震撼」
經歷是否感到好震撼?他表示︰「當時我諗唔到點回應,事後我諗番其實好簡單,試想吓坐响我隔籬嘅人(指林榮基),俾人困咗八個月,唔知可唔可以出番嚟,而罪名係欲加之罪。喺文明社會佢只係做出版業,對政權又有幾大睇法同批評呢?對佢俾人困住間房八個月,我係好震撼。」

說起有一場戲,是講述林榮基與李波的對話,阮志雄好記得這一幕︰「劇入面嘅李波同我講『交番部電腦就冇事㗎啦!』我問『真係冇事?就算冇事都出賣咗讀者。』拍呢場戲之前,我上網睇到劉霞上飛機嘅新聞,當時我好激動,但我未有即刻同劇組講呢個消息,我壓抑住情緒拍埋場戲,講對白時我仲有少少口震,good take之後我先同大家講呢個消息。林榮基困咗八個月,劉霞軟禁咗八年,劉曉波就更長,直到佢死,但係呢啲事都會不斷喺我哋身邊出現。」

操控性政權埋身
當前的香港,選舉自由及言論自由逐步被衝擊,阮志雄慶幸有些人的堅持︰「我哋睇到啲嘢越來越埋身,因為我哋面對操控性嘅政權,權力中心揸得好緊,條紅線就越來越前。」原本不怕,但現在怕,阮志雄怕甚麼?他說︰「最初我係冇諗得咁複雜,首映之後我諗吓都驚,但驚得嚟係健康嘅情緒。你驚先至會去避難,盡量令自己唔好身陷險境。」至於會否怕影響家人,他坦言︰「我哋做任何嘢,當政情要對準你,一定會連累家人。」對於港台《獅》劇,仍可以拍攝、探討一些政治話題,阮志雄坦言︰「下一輯仲有冇機會拍,真係唔知。」對於任何事阮志雄都以平常心面對,「畢竟我都65歲,搭車都只係兩蚊雞,哈哈哈!」

年輕想改變世界
從事講故事工作的雄仔叔叔阮志雄,於94年開始為小朋友講故事,他笑言︰「好多人以為我講古仔,其實我係呃佢哋講古仔畀我聽。」做講古佬超過二十多年,全因越講越喜歡:「我發覺越做越有,一個65歲嘅我,同一位6歲小朋友,開展嘅空間好大。佢哋會失驚無神講啲嘢出嚟係好正,雖然佢哋完全冇邏輯,但佢哋想像空間好大,好似石頭、光、月亮都會長大。」阮志雄形容自己是位憂鬱小生:「我年輕時想改變世界,解決唔到咪憂鬱,年紀大咗調整咗,令自己接近世界。」講古佬,講故事,不單止講別人的故事,阮志雄也打開了自己,講自己的故事。

source : https://hk.entertainment.appledaily.com/entertainment/daily/article/20181021/20526901
+++++++++++++++++++++++++++++++++++++++++++++++++++++++++++++++++
原來重起到
Good0Bad0
2018/10/21, 11:46:12 中午
本貼文共有 0 個回覆
此貼文已鎖,將不接受回覆
發表文章發起投票