以下講既野十分1999，長篇大論，無意思夾混亂，因為正正反映我現在心情。所以你可能睇完都唔知我up乜春。

其實呢一排我情緒狀態已經好差，個仆街政府根本係擺明玩野挑釁民意，好似睇死你班蟻民只係識集體唱K抗爭咁。最大鑊既係，我地又真係比佢批中，我係遊行前，已經寫過一篇文，勸誡左膠唔好騎劫，(當然我都唔期望佢地會睇到然後take it serious真係唔騎劫)連陳雲國師都轉發過，真係始料不及。

可惜好既唔靈醜既靈，偏偏20/10當日真係發生騎劫事件，八萬人(12萬係發哂水既數字，根本係毛姨姨自己FF出黎)比左膠一招小組討論趕走一大半(我係其中之一)，市民一散，民氣不再復返，想用群眾運動逼政府改變主意已經係近乎無可能既事。我離開政總個一刻，心情係灰到爆炸。

但其實我而家想講既，主要唔係政治，係想講番膠登呢度既環境，其實我想講好耐，只係一直忍住，不過今日見到一d野，令我覺得無所謂啦，都係講埋出黎啦。

我諗都會有人發覺，膠登既人數開始下跌，有d人話係因為假膠，有d人話因為厹，但我心諗呢d野隔離登一樣有，點解佢又可以旺場？
歸根究底，我自己覺得，唔關上面既原因事，係因為一d高質會員，不斷咁趕客。

有d人開post罵返高登既會員係食屎狗，我以前既諗法都係一樣，但到呢一刻，我心諗，其實佢地黎得膠登，都係有心人，都係多少帶住d熱誠過黎，你估佢地唔知呢邊人少咩？唔通佢地係傻既？我諗與其罵呢d食回頭草既人係食屎狗，不如撫心自問，係咪個d開post趕人番高登既人先係食屎狗？

有人搞比賽，你唔鍾意，ok你唔block，仲要洗埋板黎抗議，都無問題，其實每個人都有佢抗爭既自由，對於呢度為止既行動我一d都唔嬲。
但係唔肯認自己洗板，明明自己講過洗板抗議，事後用埋d語言偽術掩飾自己既行為，我就火滾啦，你敢作敢為既話我重會敬重你，但而家你咁樣做，等於認自己同梁振英一狗樣，而我並唔鍾意同梁振英上埋同一個forum，由呢個時候開始我就唔當呢d會員係人看待。然後仲日日係到亂吠，乜野都泡菜泡菜，好似比泡菜仔雞姦過咁款，有本事，你咪再洗多次皮抗議囉，或者去韓國領事館遞信囉，你又唔敢，淨係敢係度吠，如果我係新會員，見到d咁既人，我真係->即走。

你可以話，我block左佢咪得囉，無錯你講得岩，但係我就係唔知點解唔鍾意block人，就算block左都會開番出黎睇，除非係貼核突圖如果唔係我都唔會block。

你又可以話，上面既野好小事，使乜擺上心，無錯，認真就輸了，而我就輸哂，因為我對呢個forum太take it serious，我就係太鍾意堅持埋d無謂野所以先搞到比林祖舜踢過黎呢度。

所以好不幸地我今日又見到隻癲狗係度將唔關事既野都拉埋泡菜黎講。

夠了，我好厭倦再見到呢d野

發生呢d事，完全係因為當初我見大吾巴打想搞個聯賽諗住振興膠登，但完全無人理佢，呢個聯賽振唔振興到膠登我都好大疑惑，但係我就係唔想睇到一個有熱情既人完全無人理，連鬧都無人去鬧，我偶像周樹人講過："凡有一人的主張，得了贊和，是促其前進的，得了反對，是促其奮斗的，獨有叫喊于生人中，而生人并無反應，既非贊同，也無反對，如置身毫無邊際的荒原，無可措手的了，這是怎樣的悲哀呵"。呢種人最慘，所以屎忽痕之下先話想幫手。

然後佢話叫我搞泡菜聯，講真，我自己就想搞台妹多d，特別係大元，當年真係殺死我不少子孫。但係人地係搞手，佢話點就點啦，咁我就照做，所以我其實唔係咩泡菜迷，我只係奉命行事。

之後既事都唔想再花篇幅多講，有人贊成有人反對，嘈得好激烈，嘈到而家，兩邊都無人再講，只係剩番一隻癲狗日日吠。

其實我都可以忍落去，默默咁做，比人罵，無人理都繼續做，奈何我份人器量真係太小，改極都改唔好。

除此之外，仲因為現實既因素，工作既問題，身體既問題，我就唔係度講了。

而且仲有時事編輯部既事，當初pique提議既時候，我只係諗住做下宣傳，fb做下煩膠叫人睇下時報咁樣
後來發現好似冇人接手搞，我又唔想見到咁好既提議就咁慢慢比人淡忘，咁我就搵埋其他一d仲關心呢件事既兄弟，不如一齊慢慢搞番起佢啦
過程雖然唔太理想，產出亦有不少甩漏，但係編輯部既其他兄弟確實好熱心，亦好高質素，係真正既高質素，最後都死左一期創刊號出黎，下一期亦慢慢dup緊，未必做得好好，但總算有 d progress

但係我處理唔到兩件事，一件聯賽，一件時報，雖然我係編輯部其實都唔係點做過野，份野絕大多數都係d兄弟既心血。但係我唔想個心掛住兩件事，咁樣好困身，我又唔係上forum當返工，點解要攬咁多野上身？

所以慢慢聯賽我都甩哂，呢度要同大吾巴打講聲對唔住，應承左你既野我做唔到了。

極衡輕重過後，我覺得最近發生既事對我震撼太大，所以我想專注做好一件事，而最後我選擇既係時報

對唔住大吾巴打，你要鬧鳩我都無說話好講，諗落應承左人既野做唔到，我都同一隻梁振英無乜分別

係我心目中一d真正既高質巴打好似三蝦、613事變巴打咁，都因為唔同既原因而潛左水

當然仲有大麻係度，老老實實，可以見番KB既朋友真係幾開心，尤其是我覺得你係少數有見地既玩家(無講大話，當年你潛水去西藏旅行個陣我係chat room已經係咁講)

至於我呢件假膠，都無六七月個陣乜post都回一餐，一方面係心情越黎越差，另一方面坦白講值得我回既post都係越黎越少，個陣每一個post我都係真心想回先回，唔係為回而回架…

雖然話過我永遠都唔會講離開膠登呢d咁打擊士氣既野，但我覺得我都應該潛水，做番好工作既野，唔再做冗員。睇下戲、書，專心寫下文章，得閒投兩篇比時報/蘋果，月頭個陣推下飛影個追數post，得閒個陣幫下曼德拉復活，我做呢d野就夠

之後如果想開post講野，我都會揀真係好想講既野，或者有番少少質素既野，我先會開post，唔係再乜野都講一餐了。

講到呢度其實我都唔係想特別聲討邊個，亦唔係要話我岩哂你錯哂，我只係想講，上黎呢度係求開心，如果日日對住唔想見既野，會影響自己心情既，就太唔抵，因應自己心理特別脆弱，我都要做番d野保護自己。

就講住咁多先，有緣再見。
呢度既回覆我唔會睇，所以要罵隨便罵，反正我唔會知。