HKGalden時事臺
發表文章發起投票
【歷史台】超級工程:羅馬是怎樣建成的Ⅱ希律王之野望
第一季:https://hkgalden.com/view/55595

[#ff0011]暴君?[/#ff0011][#188085]精神病人?[/#188085][#0d8024]天才建築師?[/#0d8024][/size=5]



對好多人黎講,希律王應該唔係一個陌生既名字。響猶太史當中,好少統治者好似大希律王(הוֹרְדוֹס, Herod the Great, 前73年-前4年)咁具爭議性。上面三個形容詞,到底邊個適合用黎形容希律王?根據各方歷史記載,呢三個形容詞都適合形容希律王而且互不矛盾。

某程度上,希律王確實係一個暴君。佢熱愛建築、藝術,並響呢方面有唔少既成就,但生性亦非常殘暴。早年時就曾經對同前朝有關既人肆意逼害,甚至自己內兄(老婆既兄弟)亞里士多布盧斯三世(Aristobulus III)都唔放過。後來以子虛烏有既通姦罪處死左佢最愛既第二任皇后米利暗一世(Mariamne I),又以莫須有既罪名親自下令殺死三個親生兒子(包括一個已獲冊封既太子,另外兩個有說指因為外表太俊朗、太受民眾歡迎而惹起佢既嫉妒)。響佢晚年時候(尤其在位最後4年,前8-前4年,耶穌就係響呢個期間出世),痴線程度有增無減,公元前7年佢一次過處死300個軍中將領;佢知道自己就黎死時,曾經召集猶太各地既社會名流到耶利哥城既競技場,又下令軍隊將人地殺死,因為佢知道佢死後冇人會悼念佢,所以就打算用呢個毒計逼後世響果日舉國哀悼(最後冇成功,因為佢死早左)。每次當佢瘋狂逼害親人同所愛既人之後,就會自己一個陷入抑鬱狀態,之後就會起野,跟住復完,而復完後又會重新開始逼害同殺人。佢在位年間,事情就陷響呢個怪圈入面周而復始。

希律王之所以瘋狂逼害自己親人同王室成員、甚至自己親生兒子,原因無他,因為希律本身極度焦慮、神經質、偏執狂、而且經常出現幻覺、出現被害妄想症症狀(佢自己得罪人多,經常認定人地會向佢尋仇,又成日有預感人地想謀朝篡位,然後佢就會響冇確鑿證據既情況下先下手為強)。現代學者通過分析史料記載,相信希律王患有偏狂型精神分裂症,而且係幾嚴重果隻,確實係「極危險」。政府都有賣廣告:「思覺失調,及早治療」,但好可惜,雖然希臘羅馬既外科手術水平非常發達,但以當時既醫學水平,精神病基本上係冇得醫。

講到呢度,或者有讀者會問,我想聽羅馬史喎,特別係羅馬既超級工程點威,你同我講猶太人點點點關乜事?猶太國唔係離羅馬冇雷公咁遠架咩?

答:
1. 前63年開始,羅馬開始插手東地中海事務,猶太國成為羅馬臣服國,後來變附屬國,最後直接吸收入羅馬行省。希律王時期,猶太國已經係羅馬既附屬國,冇完全既主權。
2. 希律既建築技術,大量聘用埃及、希臘、羅馬既建築師,大量引入採用羅馬建築技術,所以佢既超級工程同羅馬同出一系,應該提及。

(或者希律王知道政治同軍事上羅馬已經玩曬,佢冇可能響對外軍事上有咩作為,所以希望用興建超級建築既方法留名史冊。)

希律王係一個有病既暴君,唔阻礙佢響工程史上既成就。又或者可能曠世既藝術鬼才,好多時性格都會好孤僻古怪。希律王治下既猶太國響不可能既地方建立要塞,又響一個冇天然港口既地方建成世上第一個完全人工造成既港口,耶路撒冷聖殿山既建設,更加係當之無愧猶太國史無前例既超級工程。希律既建築唔講求同自然既和諧,佢所有既工程成就都係顯示出征服大自然,利用人類既意志凌駕自然、對自然進行改造以為佢個人服務既傲慢。移山!填海!佢都冇有怕!佢想要佢自己既工程成就名留青史,呢d都完全體現左佢一心一意(single minded)既執著同決斷。呢個post係講建築史,我唔打算詳細去講希律王政治上既得失,仲有佢個人既操守同德行,呢d留比讀者自己定奪。但我會集中響建築史既角度去論述呢個一代奇人既成就。

以色列郵票:圖案係希律王既著名建築
Good10Bad0
2013/11/04, 6:50:51 早上
本貼文共有 0 個回覆
此貼文已鎖,將不接受回覆
發表文章發起投票