首先我哋欣賞吓一代刺客大師Altair點樣刺殺目標。去片
http://www.youtube.com/watch?v=oVQWJZFAcNs

有無留意到，Altair係瞄住邊個位拮入去？唔淨只Air assassination嗰陣先係咁，二代Ezio、三代Connor响刺殺大佬級人馬嗰陣，最後旣致命一擊一定係成個人跳起，騎住個目標，左手起Hidden blade向住同一個位置拮入去。又，點解係用左手？成個組織淨係收左囿？




要瞬間將目標致於死地，不外乎兩種死法︰令目標無法呼吸或者大量失血。人體需要無時無刻咁從大氣獲取氧氣，以血液運流供應全身。而確保氧氣供應同血液循環旣器官組織，正正集中响胸腔(thoracic cavity)之中。因此，胸腔由胸廓(rib cage)呢組肌骨結構所保護，而胸腔旣界限亦與之相同，下口(inferior thoracic aperture)主要由橫膈膜(diaphragm)隔開胸腔同腹腔，後面係第十二塊胸椎、後側係第十一十二對肋骨、前側係第七到十對軟肋邊緣、前面係劍胸關節(xiphisternal joint)；上口(superior thoracic aperture)連接頸部同胸腔，後面係第一塊胸椎、側面係第一對肋骨、前面係胸骨柄(manubrium)邊緣。胸廓上口無野隔住，係大量上肢、頸部血管穿過旣出入口，供應上半身；氣管(trachea)、食道(oesophagus)亦經過呢個入口，各自通向肺葉同腸胃。當然唔少得直接由腦部落蒞旣神經線。而且，左右肺尖(apex of lung)都突咗少少出蒞。

留意一樣野，所有肋骨都係由背椎斜斜地向前彎落去，所以正面睇係會見到胸廓上口。而呢個上口比較下口細好多，成人而言前後徑有6.5cm左右，橫徑有11cm左右，所以面積同範圍都比條頸細少少。





上圖大概可以睇到胸廓係點樣保護肺部同心臟。胸骨(sternal body)响正右心室(right ventricle)前面，肋骨同肋軟骨包實晒肺部前側後三面，故以兇器從正前方入手比較困難，須要避開肋骨部分，從肋間刺入。刺入肺部不能造成致命傷；即使避開晒胸骨肋骨拮入心臟，都只能於心室表面剖出一個開口，唔能夠造成大量出血而斃命。因為心室本來就有開口，直通大動脈，多咗個開口只係代表血液有第二條路走。長時間會失血過多而死，短時間就未必喇，而且有外科手術救得返。要造成大量出血，要從切開大動脈入手。



胸腔之中、肺部以外旣空間，稱為縱隔(mediastinum)。胸骨同胸骨柄之間有個屈折位，叫做胸骨角(sternal angle/angle of Louis)，胸部最容易摸到旣位置，係個好重要旣解剖標記。呢個位水平切入去，直到第四第五椎間盤(T4/T5 intervertebral disc)，橫跨一個平面，呢個平面上面就係上縱隔(superior mediastinum)，平面下面可以按心臟位置分成前中後緃隔。

基本上，解剖學者形容內臟旣位置時候，係對應緊一個瞓响度旣人體(supine position)，瞓响度同企响度旣內臟位置會有唔同。瞓緊嗰陣，呢個水平面剛好切過升主動脈(ascending aorta)同左心室旣交界；企係度時，橫隔膜沉落去，連帶心臟、主動脈跟住沉。上面兩張圖就係形容緊呢兩種情況喇，亦都解答咗一樣野︰點解要推倒目標。

升主動脈向右上離開左心室，貼近上腔靜脈(superior vena cava)，然後形成動脈弓(arch of aorta)向後、偏右彎曲。動脈弓先後跨過右肺動脈(right pulmonary artery)、氣管分支、左支氣管(left main bronchus)，到達第四胸椎，向下延伸成為降主動脈(descending aorta)。動脈弓先後有「三支香」旣動脈分支，按序為右頭臂幹(brachiocephalic trunk)、左頸總動脈(left common carotid artery)、左鎖骨下動脈(left subclavian artery)。左弓正前面係由胸骨柄所保護，而胸骨柄係胸骨組中最強韌旣骨塊，胸骨角亦令胸骨柄啱啱好可以擋住前上方旣攻擊，避免傷及動脈弓嗰條弧度。而降主動脈從胸腔到腹腔旣路徑，一直都係緊貼住脊椎，受脊椎同旁邊旣背肌保護。



講咁耐都淨係講咗身體點樣保護主動脈，終於要講邊度係弱點喇。當然係Altair、Ezio、Connor落刀嗰個位啦！呢個位置叫鎖骨上窩(supraclavicular fossa)，表面上，大概係一個三角形，靠中有胸鎖乳突肌(sternocleidomastoid)、靠前有鎖骨(clavicle)、靠後有斜方肌(trapezius)。鎖骨靠中連住胸骨柄，靠側連住肩胛骨，以此連繫中軸同附肢骨骼，輔助上肢活動，維持軀體穩定。鎖骨下面就係第一對肋骨，可以由此確定胸廓上口旣大約位置。

下圖手指掂住旣肌肉係一組鈄角肌(scalene)，分前中後三對，都係前中兩對連住第一對肋骨，後一對就連住第二對肋骨。可以話，呢啲肌肉之間旣間隙就係頸部最脆弱旣地方。






由右面旣鎖骨上窩，從正面以左手Hidden blade與水平成45度拮入去一個瞓底旣人體，可以直接橫切、或剖開動脈弓，每次心肌收縮就會從剖口逼出大量血液，流失血液無法到達三支香動脈，腦部就會因缺氧壞死。橫切動脈弓係直接致命，無醫能救。亦可能會剖開氣管、或者前斜角肌前面旣膈神經(phrenic nerve)，令橫膈膜右面肌肉旣運動神經斷裂，無法呼吸。

若果用右手正面攻擊，未必會直接剖開動脈弓，而係切斷三支香動脈造成大量失血。左面旣氣管、膈神經亦同右面類同。


最後比各位巴打欣賞Ezio大神旣華麗表演，同時大家亦可以諗吓佢刺入目標旣邊個部位，會傷害到咩器官組織。
http://www.youtube.com/watch?v=PvmaBlPnjxY


解剖臺系列︰笑到爆左肚
http://hkgalden.com/view/75486/highlight/2712