得罪講句, 我覺得有D膠登仔既諗法好離譜
大家諗下
林早洩接手高登係收購, 係一種商業行動, 佢管理高登討論區係以商業利益為先
我唔理佢話佢由唔認識高登文化到接觸, 再到認同呢d說辭係出自真心定收買人意, 定係社交說辭
佢係以CEO, 一間公司既行政總裁身份去面對外界同面對高登仔, 呢件係一件無須爭論既事
簡單d黎講, 過去既你, 高登仔, 係佢既客戶
佢提供一個免費平台俾你, 而同時係第三方手中接收廣告費
你同佢之間係一種咁樣既經營關係
就好似TVB咁, 為左大陸市場可以出賣香港人一樣, 高登亦會為左商業目的而捨棄佢唔需要既客戶

而膠登
admin從最初開始就係想建立一個自由既平台, 延續高登精神既平台俾大家
佢唔係出自商業目的, 只係純粹出於一鼓熱誠
我唔想過度咁追捧佢地, 佢地亦只係普通人, 唔係聖人亦唔係邊個派黎既使者
但係至少呢一刻, 我信任佢地係出於無私同個人理念而建立膠登呢個平台
唔見得佢地會係為左自我陶醉或者金錢利益而搞個膠登出黎
係, 時間唔係長, 我地既判斷未必正確
你亦可以搬出無限既陰謀論同人性墮落論去質疑人類-admin既本性
不過我走得入黎就已經信任左佢地係有心建立香港言論自由既橋頭堡呢件事
當然, 你唔可以排除佢地有朝一日要放手, 甚至轉讓呢個平台俾其他人
只不過, 呢件事如果要發生, 佢地作為個人資產既擁有者, 無論我地做D咩同做過D咩都改變唔到

我所講離譜既係, 有人假設膠登會步高登後塵
甚至係膠登admin會因為權力過於集中導致既腐敗而變成林早洩咁樣既人, 或者用相同既手法管理個forum
正如你唔可以話六合彩冇可能開1,2,3,4,5,6特別號碼係7一樣, 我唔可以話你呢種假設100%冇可能
只不過你睇返而家高登同膠登, 同埋個admin(s)既背景相差幾大
就應該明白到現實情況下將兩者放係同一個平台上推敲係幾咁荒謬

香港既forum之所以出現審查
係因為管理者本身唔明瞭自由同民主呢D社會基本原則
施加壓力俾呢d管理者既人更加係唔尊重呢D原則
香港過去既教育, 包括社會教育同學術教育都非常缺乏呢一種思維既開發
而且仲有個問題就係香港根本冇一種自主既憲政制度, 同時亦冇制度阻止外來勢力干預香港既各種自由

再次得罪講句
你而家係度爭取咩膠登民主同中國人爭取咩村代表選舉一樣
只係幫自己增加感覺良好既假象
如果香港本身充滿已經民主風氣, 你根本唔需要擔憂膠登會唔會變得獨裁, 亦唔會諗辦法爭取膠登民主

長文, 希望用心一看, 然後隨便插